«Յար, արի Գյումրի» նոր հայ-վրացական ֆիլմի պրեմիերան կայացավ Հ1-ի եթերում

Բնակչության քանակով ու մշակութային նշանակությամբ Հայաստանի երկրորդ քաղաքի մասին պատմող «Յար, արի Գյումրի» փաստագրական ֆիլմի հեռուստապրեմիերան կայացավ ս.թ. նոյեմբերի 7-ին Առաջինի եթերում:

Դիտելով «Յար, արի Գյումրի» ֆիլմը` ականատես ենք դառնում հայաստանյան հնագույն քաղաքներից մեկի՝ Գյումրիի (նախկինում՝ Լենինական և Ալեքսանդրոպոլ) պայծառ, գունագեղ և յուրօրինակ կոլորիտի ներքո սիրո մի գրավիչ պատմությանը, որը շարադրված է գյումրեցուն բնորոշ հումորով, ժողովրդական լեգենդ Պոլոզ Մուկուչի ծիծաղելի անեկդոտների և հայտնի մեղեդիների համադրությամբ: Գումարած դրան ֆանտաստիկ հուզիչ պատմվածք մի նամակ-ուղերձի մասին, որը մեծ հայ դերասան Ֆրունզիկ (Մհեր) Մկրտչյանը ժամանակին գրել էր վրացական կինոյի մեծագույն վարպետին ու իր մտերիմ ընկերոջը Վախթանգ (Բուբա) Կիկաբիձեին, և որը տարիներ անց, Ֆրունզիկի վախճանից հետո, ինչ-ինչ ճանապարհներով հասնում է հասցեատիրոջը:  Նամակում ընդամենը մեկ նախադասություն է, բայց շատ ազդեցիկ՝  «Երբ տխրես, պարզապես նայիր ու ժպտա, քո Ֆրունզ»։ Ահա սրանք են «Յար, արի Գյումրի» ֆիլմի սցենարի հիմնական ուրվագծերը։ Հերոսներից մեկը հենց ինքը՝ Վախթանգ Կիկաբիձեն է:

Գյումրին ֆիլմում հանդես է գալիս շատ պոզիտիվ տեսանկյունից, որի միջոցով փորձ է արվում արտացոլել Գյումրու բնակիչների հավաքական կամքն ու լավատեսությունը, ցայտուն հումորն ու անհավանական դրական էներգետիկան: Նշենք, որ Վիկտորյա Մակսոևան շուտվանից էր  պլանավորում նկարահանել այս ֆիլմը, քանի որ նրան Գյումրու հետ ընտանեկան պատմություն է կապում։ Վիկտորյայի տատը՝ Արշալույս Հակոբյանը դեռ մանկական հասակում Ցեղասպանությունից հետո Ալեքսանդրապոլ է (ներկայումս՝ Գյումրի) գաղթում։ Որոշ ժամանակ անց նրա զարմիկը գտնում է նրան քաղաքի մանկատներից մեկում ու իր հետ Թբիլիսի է բերում։ Հենց այդ հիշողություններ են, որ դրդել են սցենարի հեղինակին ֆիլմում ցուցադրել Գումրին իր ամբողջական ինքնատիպությամբ, հումորով, արխիվային վավերագրական նյութերի և նորարարական գեղարվեստական գյուտերի կիրառման միջոցով:

Անկասկած, «Յար, արի Գյումրի» ֆիլմը կգտնի իր մասսայական և շնորհակալ հանդիսատեսին, պահանջված ու սիրված կդառնա ինչպես Հայաստանում, այնպես էլ երկրի սահմաններից դուրս: Սակայն ֆիլմի ամենագլխավոր և հավատարիմ հանդիսատեսը կմնան բուն գյումրեցիները՝  անվերջ սիրահարված իրենց հարազատ քաղաքին, նրա հերոսական անցյալին, ներկային ու ապագային: Նշենք, որ ֆիլմի հեղինակները հետապնդում են նաև այլ նպատակներ՝ ուղղված հայ-վրացական կապերի, երկու եղբայրական հարևան ժողովուրդների բարեկամության և համագործակցության ամրապնդմանը: Դրա հետ մեկտեղ ֆիլմը նախատեսվում է ներկայացնել տարբեր կինոփառատոնների՝ Ռուսաստանում, Եվրոպայում և Ամերիկայում: Նկարահանող խումբը համոզված է, որ այս ֆիլմը նաև նոր ջիղ կհաղորդի Գյումրիում զբոսաշրջության զարգացմանը:

 

«Յար, արի Գյումրի» ֆիլմը նկարահանված է վրացական ՙՙԱգորա-Ջորջիա՚՚ ՀԿ կինոընկերության կողմից, որը հիմնադրել և ղեկավարում է Վիկտորիա Մակսոևան: Ֆիլմի շնորհանդեսն ու փակ ցուցադրությունը տեղի ունեցան հոկտեմբերի 8-ին Գյումրու Սև Բերդ ամրոցի կինոհամերգային դահլիճում, ուր հրավիրված էին քաղաքի հասարակայնության և ստեղծագործ ինտելեգենցիայի ներկայացուցիչները, ֆիլմի նկարահանող խումբը:  Ֆիլմի տևողությունն է  49 րոպե։

 

Իդեպ, Վիկտորիա Մակսոևայի և Գարիկ Աբելյանի ստեղծագործական համագործակցությունը սկսվել է 2016 թվականին, երբ Երևանում համատեղ իրականացրեցին «Մերոնք մերոնց մոտ» ֆիլմի նկարահանումը, որը պատմում է Երևանում բնակվող վրացիների մասին։ Դրան հաջորդեցին մի շարք այլ ֆիլմեր, հանձինս՝ ՙՙԵս մեկնում եմ Երևան՚՚ ֆիլմը, որի նկարահանման գլխավոր հովանավորի կարգավիճակում  նույպես հանդես եկավ ՎԵԳԱ ընկերությունը, Ռուսաստանում արժանացել է "Золотой витязь" հեղինակավոր մրցանակի և ներկայումս գտնվում է "Северный характер" կինոփառատոնի անվանակարգում:

«Յար, արի Գյումրի» ֆիլմի կարճ անոնցը դիտեք՝ https://youtu.be/w9mfRmB7h6w, իսկ ամբողջովին ֆիլմը կարող եք դիտել՝  https://www.youtube.com/watch?reload=9&v=i5my2_JxK6M&fbclid=IwAR1HL83uJdQEufkRkhVQF3fwfhvR920bjR3RYYDksplKbd1RQVfp--av3-g հղումով:

 

Ցանկանում ենք Ձեզ հաճելի ժամանց: