Երևանում կայացավ ՙՙՈւշուի և Քունգֆուի Եվրասիայի աստղերի Գավաթ՚՚ միջազգային մրցաշարը

Ընդհանուր առմամբ մրցաշարում, որն  անցավ Երևանի ՙՙԴինամո՚՚ և ՙՙՄիկա՚՚ մարզահամալիրներում, մասնակցություն ունեցան 161 ուշուի վարպետներ, սկսնակ և երիտասարդ մարզիկներ 7 երկրներից՝ Վրաստան, Իրան, Լիբանան, Լեհաստան, Ֆրանսիա, Էստոնիա և Հայաստան, ինչպես նաև անկախ մասնակիցներ:
 
Խաղարկվեցին 190 ոսկե, արցաթե և բրոնզե մեդալներ, իսկ 91 մարզիկ, որոնք զբաղեցրեցին առաջին տեղերը, ոսկե մեդալների հետ մեկտեղ արժանացան նաև մրցաշարի Գավաթներին:

Մրցաշարն անցավ  Հայաստանի սպորտի և երիտասարդության նախարարության և Ազգային օլիմպիական կոմիտեի աջակցությամբ, ՎԵԳԱ Ընկերության և SKYWORTH համաշխարհային բրենդի ակտիվ հովանավորչության ներքո:  Այն նախատեսվում է դարձնել ավանդական եւ անցկացնել  երկու տարին մեկ:   

Հայաստանի Ավանդական Ուշույի Ֆեդերացիայի և ուշուի մասին հակիրճ:
1992թ.-ին մի խումբ միաբան-գաղափարակից ուշույի մասնագետներ ստեղծեցին Հայաստանի ավանդական ուշույի ֆեդերացիան: Ֆեդերացիայի հիմնադիրները նպատակ ունեին շրջանցելով ուշույի կրոնական բաղկացուցիչը, Հայաստանում զարգացնել եւ տարածել հրաշալի մարտարվեստ իր ամբողջական էությամբ: Գաղափարի շուրջ հավաքված էնտուզիաստներին հաջողվեց կյանքի կոչել այդ միտքը:
Ուշուն հանդիսանում է ռազմագիտության, արվեստի եւ փիլիսոփայության միասնություն:
Ուշուն /թարգմանաբար նշանակում է武 Wu 术 Shu վարպետության շնորհիվ կասեցնել զենք/ նպաստեց այնպիսի արվեստների զարգացման, ինչպիսիք են՝ գեղագրությունը, որմնանկարչությունը, զինագործությունը, թատրոնը, պոեզիան, երաժշտությունը: Ուշույի ամենահայտնի տրակտատներից է. ՙՙՈւշույի վարպետը պետք է հավասարաչափ տիրապետի վրձնին ու թրին, իմանա պոեզիա, կալիգրաֆիա, երաժշտություն՚՚:
Ուշույի մյուս կարեւոր բաղադրիչը՝ առողջարարական ուշուն է, որն այսօր պաշտոնապես ընդունված է ավանդական բժշկության կողմից:
Հայաստանի Ավանդական Ուշույի Ֆեդերացիայի հիմնադիրները՝ Տիգրան Չոբանյանը, Վարդան Օհանյանը, Արմեն Սամուելյանը եւ Վիկտոր Բաղդասարյանն նպատակահարմար համարեցին զարգացնել ուշուի տարբեր ուղղություններ, ստեղծվեցին մենամարտային, սպորտային, առողջարարական ուշույի խմբակներ:
1993-ից Ֆեդերացիան հիմնեց «Մոնթե Մելքոնյանի հիշատակին նվիրված մրցաշար»:
Աստիճանաբար բարձրացնելով մարզիկների մակարդակը՝ 1995-ից  անցկացվում են Հայաստանի պաշտոնական առաջնություններ, ինչպես նաեւ միջազգային մրցաշարեր:
1997-1998 թթ Ֆեդերացիան ճանաչվեց Հայաստանի Ազգային Օլիմպիական Կոմիտեի, Ուշույի միջազգային ֆեդերացիայի կողմից և Ուշույի Եվրոպայի ֆեդերացիայի կողմից:
1997-ի հոկտեմբերին Ուշույի հավաքականի թիմն առաջին անգամ մասնակցեց Հռոմում անցկացվող Ուշույի աշխարհի 4-րդ պաշտոնական առաջնությանը: Այսպիսով Ուշույի հավաքական թիմը սկսեց մասնակցել Եվրոպայի–Աշխարհի բոլոր առաջնություններին:
1998-2000 թթ. մասնակցելով ԱՄՆ-ում անցկացվող 26 ուժեղագույն թիմերի միջազգային մրցաշարերին, հայ ուշուիստները տոնել են տպավորիչ հաղթանակներ, իսկ  2000-ից մինչ օրս մասնակցում են Եվրոպայի-Աշխարհի բոլոր առաջնություններից և վերադառնում են ոսկե, արծաթե եւ բրոնզե մեդալներով:
Ֆեդերացիան ամեն տարի պարտադիր կազմակերպում է ՀՀ առաջնություններ, ուշուի և մարտարվեստների փառատոններ:
Հայաստանի ավանդական ուշուի ֆեդերացիայում պաշտոնապես ընդգրկված են ավելի քան 3000 մարզիկ-մարզուհի Հայաստանի տարբեր մարզերից: 

Ֆեդերացիայի պաշտոնական կայքի հասցեն է՝ http://www.wushu.am/